حقا هل هذا هو المقياس الحقيقى الذي تقيس من خلاله رجولتك
دائما احتار في الاجابة عن هذا السؤال
واقول بس هذا ؟!!!
يعني خلاص ولت رجولة الأزمنة الأولى ؟!!!
خلاص ولت معتقدات الرجولة الأولى ؟!!!
وصار التفاخر في الرجولة محصور عند البعض في عدد النساء اللواتي تعرفهم
ويمكن بعد مب حاصلك انك تعرفهم
كل واحد هالأيام مسوي نفسه وعلى كلامه مسكت الشباب في صيداته للبنات
ويقول وبفمه العريض والله انا عرفت فلانه ومشيت مع فلانه وقصيت على فلانه
وفلانه تركض وراي ومب معطها ويه وغير باقي الخريط
والقوم يلي عنده مسبلين الحلوج وفرحانين بلي يقوله ومعطين ويه للي ماله ويه
مادري أقول عن هالشي مراهقه ولا عبط ولا حاله نفسيه أو محاوله للقضاء على
جرح مدمل ولا عدم تربيه ولا أهله ربوه على هالشي ولا هي بيئه نشأ فيها ما عنده
غير هالسوالف يقولها ولا ما يفهم غير في هالكلام ولا ماعنده أم وخوات ولا... ولا ...ولا...
أبي أفهم بس
لو ردينا لأزمنة قبل تشوف الريال يستحي يقول عن اشيا زينه بحياته ويعد هالأمور سوالف
ماتمت بالرجوله بأي علاقه
وحتى ولو حب يعني ولا أحد يدري بحبه رغم انه ماسوى شي غلط بس أحتراما للي
يحب والريال مايجيب للحريم طاري على لسانه
أما اللحين والله فلانه والله علانه استح على ويهك عيب يالدسوي
ريال سوالفك كلها عن الحريم
الريال يلي يلعب على الحريم مب ريال ...والريال يلي يهين الحريم مب ريال
الريال ستر وغطى لأهله مب فاضح يالفاضح
علشان تقول عن هاذي وهاذي وكله تاليف يالفاضي وإذا عندك نقص في هالأمور
ترى المصحات تارسه الدوله
ياخي تفاخر برجولتك وقيسها بسوالف الرجال مب بسوالف الحريم والبنات
طلع نخوتك بانك تكون عون لاهلك وربعك وناسك
اختار الأمور يلي تقدر تقول فيها انا ريال
ولا الرجوله بس بصيد البنات وهالمقصه وسوالف الكذب والخرط والتأليف
يعني ماشي انت ما مخلي بنت إلا ومطيحهها
عيب استح بسك من هالسوالف
خلك ند للرياييل مب للحريم علشان نقدر نقول ريال
السبت أبريل 19, 2008 10:17 pm
